अमेरिकी राष्ट्रपति डोनाल्ड ट्रम्पले आफ्नो कम्पनीबाट बजारमा ल्याएको पहिलो स्मार्टफोन ‘Trump T1’ लाई ‘मेड इन यूएसए’ अर्थात् अमेरिकामै बनेको भन्दै प्रचार गरेका थिए। तर हाल उक्त दाबी ट्रम्प मोबाइलको आधिकारिक वेबसाइटबाट हटाइएको छ, जसले ‘फोन अमेरिकामा बनेको हो कि होइन’ भन्ने विषयमा प्रश्न उठाएको छ।
ट्रम्प मोबाइलले सुरु गरेको वायरलेस सेवा र फोन कम्पनीले अब आफ्ना फोन अमेरिकामै बनेको दाबी नगरेको देखिन्छ। २२ जुनदेखि वेबसाइटमा ‘मेड इन यूएसए’ शब्द हटाइएर फोनलाई ‘अमेरिकी मूल्यहरूलाई ध्यानमा राखेर डिजाइन गरिएको’ भनेर मात्र उल्लेख गरिएको छ। पुराना वेबसाइटको आर्काइभ संस्करणमा भने स्पष्ट रूपमा फोन अमेरिकामै बनेको उल्लेख थियो।
प्रविधि विश्लेषकहरूले शुरूदेखि नै ट्रम्पको फोनको ‘अमेरिकी उत्पादन’ दाबीमा शंका गरेका थिए। उनीहरूको भनाइ अनुसार, Trump T1 8002 को स्पेसिफिकेशन चीनको एक निर्माताले बनाएको फोनसँग निकै मिल्दोजुल्दो छ। ट्रम्प मोबाइलका प्रवक्ताले भने यो दाबी गलत र भ्रामक भएको बताएका छन् र फोन गर्वका साथ अमेरिकामै उत्पादन भइरहेको बताएका छन्।
कम्पनीले पहिले ४९९ अमेरिकी डलर मूल्यको सुनौलो रंगको फोन अमेरिकामै डिजाइन र निर्माण गरिएको प्रेस विज्ञप्तिमा उल्लेख गरेको थियो। तर पछि ट्रम्प मोबाइलका साझेदारहरूले भने फोन अमेरिका मै बनाउन सकिने सम्भावना मात्र रहेको बताएका छन्।
विश्लेषकहरूका अनुसार ‘डिजाइन’ र ‘निर्माण’ बीच फरक छ। एप्पलले जस्तै क्यालिफोर्नियामा डिजाइन गर्ने तर चीन वा भारतमा असम्बल गर्ने जस्तो, ट्रम्प मोबाइलले भनेको ‘अमेरिकामै जीवन्त बनाइएको फोन’ भन्ने कुरा स्पष्ट छैन कि फोन कहाँ बनेको हो। वास्तवमा कुनै पनि स्मार्टफोन पूर्णरूपमा अमेरिकामै बनाइँदैन भन्ने कुरा विश्लेषकहरूले बताएका छन्।
ट्रम्प मोबाइलको वेबसाइटमा फोनको स्क्रीन साइज पनि ६.७८ इन्चबाट ६.२५ इन्चमा घटाइएको छ र मेमोरी स्पेस सम्बन्धी जानकारी हटाइएको छ, जसले फोनको कार्यसम्पादनमा महत्वपूर्ण भूमिका खेल्दछ।
विशेषज्ञहरूले भनेका छन् कि ट्रम्पको फोनको डिजाइन चीनको कम्पनी विंगटेकले बनाएको Revvl 7 Pro 5G फोनसँग अत्यन्त मिल्दोजुल्दो छ, जुन मात्र १६९ अमेरिकी डलरमा अमेजनमा उपलब्ध छ।
And the answer is… Wingtech REVVL 7 Pro 5G!
Same device as the T-Mobile REVVL 7 Pro 5G, custom body. Wingtech, now owned by Luxshare, makes it in Jiaxing, Wuxi, or Kunming China https://t.co/KFS3WtMF5O
— Max Weinbach (@MaxWinebach) June 16, 2025
यसरी, ट्रम्प मोबाइल फोन ‘मेड इन यूएसए’ भएको दाबीमा गम्भीर शंका उठेको छ र यो विषयले थप बहसलाई निम्त्याएको छ।
